Nidānaparivartaḥ
Technical Details
suvarṇaprabhāsasūtram
|| suvarṇaprabhāsottamasūtrendrarājaḥ ||
|| nidānaparivartaḥ ||
om namaḥ śrīsarvabuddhabodhisattvebhyaḥ |
om namaḥ śrībhagavatyai āryaprajñāpāramitāyai || tadyathā |
om śrutismṛtigativijaye svāhā ||
yasmin pāramitā daśottamaguṇāstaistairnayaiḥ sūcitāḥ
sarvajñena jagaddhitāya daśa ca prakhyāpitā bhūmayaḥ |
ucchedadhruvavarjitā ca vimalā proktā gatirmadhyamā
tatsūtraṃ svarṇaprabhānigaditaṃ śṛṇvantu bodhyarthinaḥ ||
śrutaṃ mayaikasamaye gṛdhrakūṭe tathāgataḥ ||
vijahāra dharmadhātau gambhīre buddhagocare || 1 ||
bodhisattvasamuccayayā mahākuladevatayā, sarasvatyā ca mahādevatayā, śriyā ca mahādevatayā, dṛḍhayā ca mahāpṛthivīdevatayā, hārītyā ca mahādevatayā, evaṃ pramukhābhirmahādevatābhiranekadevanāgayakṣarākṣasagandharvāsuragaruḍakinnaramahoragamanuṣyāmanuṣyaiḥ sārdham | athāyuṣmānānando bhagavantametadavocat | kiṃ tāsāṃ bhagavandharmavinayaṃ bhaviṣyatīti ?
bhagavānāha gāthābhiḥ | bhāvanaṃ ca na duḥpṛcchayā virajaskaṃ samādhiṃ dharmasāraṃ pratiṣṭhitam |
śuddheṣu virajaskeṣu bodhisattvottameṣu ca |
nidānaṃ sūtrarājendraṃ svarṇaprabhāsottamamidam || 2 ||
tato gambhīraśravaṇena gambhīravyupaparīkṣaṇena |
dikṣu catasṛṣu buddhairadhiṣṭhānamadhiṣṭhitam || 3 ||
akṣobhyarājaḥ pūrvasmindakṣiṇe ratnaketunā |
paścimāyāmamitābha uttare dundubhisvaraḥ || 4 ||
taṃ pravakṣyāmyadhiṣṭhānaṃ māṅgalyadeśanottamam |
sarvapāpavināśārthaṃ sarvapāpakṣayaṃkaram || 5 ||
sarvasaukhyapradātāraṃ sarvaduḥkhavināśanam |
mūlaṃ sarvajñatattvasya sarvaśrīsamalaṅkṛtam || 6 ||
upahatendriyā ye hi sattvā naṣṭā hatāyuṣaḥ |
alakṣmyā pariviṣṭā hi devatāsu parāṅmukhāḥ || 7 ||
kāntayā te janā dviṣṭāḥ kuṭumbādiṣvapadrutāḥ |
parasparaviruddhā vā arthanāśairupadrutāḥ || 8 ||
śokāyāseṣvanarthe ca bhaye vyasana eva ca |
grahanakṣatrapīḍāyāṃ kākhordadāruṇagrahaiḥ || 9 ||
pāpakaṃ paśyati svapnaṃ śokāyāsasamucchritam |
tena ca snānaśucinā śrotavyaṃ sūtramuttamam || 10 ||
śṛṇvanti ya idaṃ sūtraṃ gambhīraṃ buddhagocaram |
prasannacittāḥ sumanasaḥ śucivastrairalaṅkṛtāḥ || 11 ||
teṣāṃ sarve tathā nityamupasargāḥ sudāruṇāḥ |
tejasā cāsya sūtrasya śāmyante sarvaprāṇinām || 12 ||
svayaṃ te lokapālāśca sāmātyāḥ sagaṇeśvarāḥ |
teṣāṃ rakṣāṃ kariṣyanti hyanekairyakṣakoṭibhiḥ || 13 ||
sarasvatī mahādevī tathā nairañjanavāsinī |
hārītī bhūtamātā ca dṛḍhā pṛthivīdevatā || 14 ||
brahmendraistridaśendraiśca maharddhikinnareśvaraiḥ |
garuḍendraistathā sārdhaṃ yakṣagandharvapannagaiḥ || 15 ||
te ca tatropasaṃkramya sasainyabalavāhanāḥ |
teṣāṃ rakṣāṃ kariṣyanti divārātrau samāhitāḥ || 16 ||
idaṃ sūtraṃ prakāśiṣye gambhīraṃ buddhagocaram |
rahasyaṃ sarvabuddhānāṃ durlabhaṃ kalpakoṭibhiḥ || 17 ||
śṛṇvanti ya idaṃ sūtraṃ ye cānye śrāvayanti ca |
ye kecidanumodante ye ca pūjāṃ karonti hi || 18 ||
te pūjitā bhaviṣyanti hyanekaiḥ kalpakoṭibhiḥ |
devanāgamanuṣyaiśca kinnarāsuraguhyakaiḥ || 19 ||
puṇyaskandhamaparyantamasaṃkhyeyamacintitam |
yatteṣāṃ prasṛtaṃ bhoti kṛtapuṇyāna prāṇinām || 20 ||
pragṛhītā bhaviṣyanti sarvabuddhairdiśo daśa |
gambhīracaritebhiśca bodhisattvaistathaiva ca || 21 ||
caukṣacīvaraprāvṛtya sugandhajalapāvanaiḥ |
maitrīcittaṃ samutthāpya pūjitavyamatandritaiḥ || 22 ||
vipulaṃ vimalaṃ cittamātmānaṃ prakariṣyati |
prasādayaṃśca cetāṃsi śṛṇudhvaṃ sūtramuttamam || 23 ||
svāgataṃ ca manuṣyeṣu sulabdhaṃ manuṣaṃ phalam |
sujīvitāśca jīvanti sūtraṃ śṛṇvanti ye tvidam || 24 ||
uptakuśalamūlāste bahubuddhaprakāśitāḥ |
yeṣāmidaṃ karṇapuṭe deśitaṃ saṃpraviśyatīti || 25 ||
iti śrīsuvarṇaprabhāsottamasūtrendrarāje
nidānaparivartto nāma prathamaḥ ||